அயோத்தி ராமர் கோயில் கட்டுமானப் பணி நிறைவடைந்ததையடுத்து, 161 அடி உயர கோபுர உச்சியில் பிரதமர் மோடி நேற்று காவிக் கொடி ஏற்றினார்.

உத்தர பிரதேச மாநிலம் அயோத்தியில் ஸ்ரீ ராம ஜென்மபூமி அறக்கட்டளை சார்பில் பிரம்மாண்ட ராமர் கோயில் கட்டும் பணி 2020 ஆகஸ்டில் தொடங்கியது. இதன் ஒரு பகுதியாக 2024-ம் ஆண்டு ஜனவரி 22-ம் தேதி குழந்தை ராமர் சிலை பிராண பிரதிஷ்டை விழா நடைபெற்றது.

இதையடுத்து பொதுமக்களின் வழிபாட்டுக்கு கோயில் திறக்கப்பட்டது. எனினும், கட்டுமானப் பணி தொடர்ந்து நடைபெற்று வந்தது. இந்நிலையில், முழு கட்டுமானப் பணியும் கடந்த அக்டோபர் 30-ம் தேதி நிறைவடைந்தது. இதையடுத்து, பிரதான கோயில் கோபுர உச்சியில் கொடியேற்றும் விழா நேற்று நடை பெற்றது.

இவ்விழாவில் பங்கேற்க பிரதமர் மோடி நேற்று அயோத்திக்கு வந்தார். கோயில் வளாகத்தில் லட்சுமணருக்காக கட்டப்பட்டுள்ள சேஷாவதார் கோயிலில் பிரதமர் மோடி வழிபாடு செய்தார். இதைத் தொடர்ந்து, குழந்தை ராமரை வழிபட்டார். இதைத் தொடர்ந்து, பிரதமர் மோடியும், ஆர்எஸ்எஸ் தலைவர் மோகன் பாகவத்தும் இணைந்து பிரதான கோயிலின் கோபுர உச்சியில் காவிக் கொடியை ஏற்றினர்.

161 அடி உயரம் கொண்ட கோபுரத்தில் ஏற்றப்பட்டுள்ள அந்தக் கொடி 10 அடி உயரமும், 20 அடி நீளமும் கொண்டது. அந்தக் கொடியில், ராமர் பிறந்த சூரிய குலத்தை குறிக்​கும் வகை​யில் சூரிய சின்​னம், மையத்​தில் ஓம் மற்​றும் மந்​தாரை மரம் ஆகியவை பொறிக்​கப்​பட்டுள்ளன. இந்நிகழ்ச்சியில் உத்தர பிரதேச ஆளுநர் ஆனந்திபென் படேல், முதல்வர் யோகி ஆதித்யநாத் உள்ளிட்டோர் பங்கேற்றனர்.

இந்நிகழ்ச்சியில் பிரதமர் நரேந்திர மோடி பேசியதாவது: அயோத்தி நகரம் தனது வரலாற்றில் இன்னொரு முக்கியத்துவம் வாய்ந்த நிகழ்வைக் கண்டு வருகிறது. ராமர் கோயிலில் கொடியேற்றி இருப்பதன் மூலம் பல ஆண்டு கனவு நனவாகி உள்ளது. இதற்காக பாடுபட்ட அனைவருக்கும் தலைவணங்குகிறேன்.

அயோத்தி மீண்டும் உலகத்துக்கு உதாரணமாக விளங்கும் நகரமாக இப்போது உருவெடுத்து வருகிறது. த்ரேதா யுகத்தின் அயோத்தி மனிதகுலத்துக்கு தர்மத்தின் பரிசை வழங்கியது. 21-ம் நூற்றாண்டில் அயோத்தி மனிதகுலத்துக்கு புதிய வளர்ச்சி மாதிரியை வழங்குகிறது. அப்போது, அயோத்தி நற்பண்பின் மையமாக இருந்தது. இப்போது, அயோத்தி ஒரு வளர்ந்த இந்தியாவின் முதுகெலும்பாக உருவெடுத்து வருகிறது.