பணிப்பெண்ணை சித்ரவதை செய்த வழக்கில், பல்லாவரம் திமுக எம்எல்ஏ கருணாநிதியின் மகன் ஆண்டோ மதிவாணன் மற்றும் மருமகள் மெர்லினா ஆகியோருக்கு நிபந்தனை ஜாமீன் அளிக்கப்பட்டுள்ளது.

சென்னை பல்லாவரம் தொகுதி திமுக எம்எல்ஏ கருணாநிதியின் மகன் ஆண்டோ மதிவாணன் வீட்டில் உளுந்தூர்பேட்டையை சேர்ந்த ரேகா என்ற 17 வயது சிறுமி வீட்டு வேலை பார்த்து வந்தார். தனது மேற்படிப்புக்கு பணம் சேர்ப்பதற்காக வீட்டு வேலைக்கு சென்ற சிறுமி ரேகாவை ஆண்டோ மதிவாணனும் அவரது மனைவி மெர்லினாவும் அடித்து துன்புறுத்தியதாக புகார் எழுந்தது.

மேலும் சிறுமியின் உடம்பில் சிகரெட்டால் சுட்ட தீக்காயங்களும் இருந்தன. இதுதொடர்பான புகைப்படங்கள் சமூக வலைதளங்களில் வெளியானது. சிறுமி தனக்கு நேர்ந்த கொடுமைகளை வாக்குமூலம் அளித்த வீடியோவும் வைரலானது. இந்நிலையில் இதனை தொடர்ந்து ஆண்டோ மதிவாணன் மற்றும் அவரது மனைவி மீது வன்கொடுமை தடுப்புச்சட்டத்தின் கீழ் வழக்குப்பதிவு செய்யப்பட்டது.

இதனை தொடர்ந்து ஆண்டோ மதிவாணனும் அவரது மனைவியும் தலைமறைவாயினர். அவர்களை தனிப்படை போலீசார் கடந்த மாதம் 25ஆம் தேதி கைது செய்து சிறையில் அடைத்தனர். இந்நிலையில் இருவரும் பிணைக் கோரி சென்னை உயர் நீதிமன்றத்தில் மனுத்தாக்கல் செய்திருந்தனர்.

இந்த மனு நீதிபதி எம்.நிர்மல்குமார் முன்பு நேற்று முன்தினம் விசாரணைக்கு வந்தது.. இரண்டு வாரங்களுக்கு விசாரணை அதிகாரிகள் முன்பு ஆஜராக வேண்டும் என்று நிபந்தனையுடன் சென்னை உயர் நீதிமன்றம் இருவருக்கும் ஜாமீன் வழங்கியுள்ளது. ஜாமீன் கோரி இருவரும் தாக்கல் செய்த மனு இன்று நீதிபதி நிர்மல் குமார் முன் விசாரணைக்கு வந்தது. அப்போது திமுக எம்எல்ஏ மகன் மற்றும் மருமகன் தரப்பில், “பெற்றோர் இல்லாமல் தங்களது 4 வயது குழந்தை பாதிக்கப்பட்டுள்ளது. எனவே எங்களுக்கு ஜாமீன் வழங்க வேண்டும்” என்ற கோரிக்கையினை முன் வைத்தனர்.