விபத்துக்குள்ளான எம்ஐ 17வி5 ஹெலிகாப்டர் குறித்த சிறப்பு தகவல்கள்.!

இந்தியா

விபத்துக்குள்ளான எம்ஐ 17வி5 ஹெலிகாப்டர் குறித்த சிறப்பு தகவல்கள்.!

விபத்துக்குள்ளான எம்ஐ 17வி5 ஹெலிகாப்டர் குறித்த சிறப்பு தகவல்கள்.!

நீலகிரி மாவட்டம் குன்னூர் அருகே காட்டேரி பகுதியில் சென்றபோது ராணுவ ஹெலிகாப்டர் விபத்துக்குள்ளானதில் ஹெலிகாப்டரில் பயணம் செய்த முப்படை தலைமை தளபதி பிபின் ராவத், அவரது மனைவி உள்பட 13 பேர் உயிரிழந்தனர்.

ஹெலிகாப்டரில் பயணம் செய்த கேப்டன் வருண் சிங், 80 சதவீத தீக்காயங்களுடன் மருத்துவமனையில் சிகிச்சை பெற்று வருகிறார். நாட்டையே உலுக்கிய இந்த துயர சம்பவம் குறித்து பல்வேறு தரப்பினரும் அதிர்ச்சியும் வேதனையும் தெரிவித்து வருகின்றனர்.

எம்ஐ-17வி5 ரக ஹெலிகாப்டர் சிறப்பு இயல்புகள்

எம்ஐ-17வி5 எனப்படும் இந்த ஹெலிகாப்டர், ரஷிய தயாரிப்பு. கடந்த 2012-ம் ஆண்டு இந்திய விமானப்படையில் இணைக்கப்பட்டது.

* ரஷியன் ஹெலிகாப்டர்ஸ் நிறுவனத்தின் துணை நிறுவனமான கஸானின் தயாரிப்பான எம்ஐ-17வி5 ஹெலிகாப்டர், இந்த வகை நடுத்தர ஹெலிகாப்டர்களில் அதிநவீனமானது.

* எம்ஐ-8/17 ரக ஹெலிகாப்டர்களிலேயே தொழில்நுட்ப ரீதியாக மிகவும் முன்னேறிய எம்ஐ-17வி5 ஹெலிகாப்டர், சக்திவாய்ந்த இரட்டை என்ஜின்கள் பொருத்தியது. ராணுவ பணிகளுக்கு என்றே பிரத்தியேகமாக தயாரிக்கப்பட்டது.

* அதிகபட்சம் மணிக்கு 250 கி.மீ. வேகத்தில் செல்லக்கூடிய இந்த ஹெலிகாப்டர், 36 பேர் வரை சுமந்து செல்லக்கூடியது.

* அதிகபட்சம் 13 ஆயிரம் கிலோ எடையுடன் பறக்கத் தொடங்கக்கூடிய இந்த ஹெலிகாப்டர், அதிக அளவாக 4 ஆயிரம் கிலோ எடையை வெளிப்புறமாக சுமந்துசெல்லும் திறன் கொண்டது.

* நெருக்கடிகளின்போது மனிதாபிமான பணிகளையும், பேரழிவுகளின்போது நிவாரண நடவடிக்கைகளையும் மேற்கொள்ளவும், போக்குவரத்து பணிகளுக்கும் உதவும்வகையில் இந்திய ஹெலிகாப்டர் அணியை வலுப்படுத்த தீர்மானிக்கப்பட்டது.

* அதன்படி 80 எம்ஐ-17வி5 ஹெலிகாப்டர்களை வாங்க 2008-ம் ஆண்டு ரஷியாவுடன் இந்தியா ஒப்பந்தம் செய்தது. பிற்பாடு, மேலும் 151 இந்த ரக ஹெலிகாப்டர்களை வாங்கும் வகையில் ஒப்பந்தம் விரிவுபடுத்தப்பட்டது.

* கடந்த 2011-ம் ஆண்டு செப்டம்பரில் இந்த ஹெலிகாப்டர்களின் முதல் தொகுதி, இந்தியா வந்தது. 2012-ம் ஆண்டு பிப்ரவரியில் இந்திய விமானப் படையில் முறைப்படி இணைக்கப்பட்டது.

* தற்போது இந்திய விமானப்படையில் 200-க்கு மேற்பட்ட எம்ஐ-17வி5 ஹெலிகாப்டர்கள் உள்ளன.

* உயரமான மலைப்பகுதிகளுக்கு வீரர்களையும், சரக்குகளையும் கொண்டு செல்லும் நோக்கில் விமானப்படை இந்த ஹெலிகாப்டர்களை தனது படை வரிசையில் சேர்த்துக்கொண்டது.

* இதில், வானிலையை அறியும் ஒரு ரேடாரும், இரவில் பார்ப்பதற்கு வசதியான புதிய தலைமுறை சாதனங்களும் உள்ளன.

* இந்த ஹெலிகாப்டரில் புதிய தானியங்கி செலுத்து அமைப்பும், ‘ஏவியானிக்ஸ் சூட்’ எனப்படும் பல்வேறு முக்கிய சாதனங்களின் தொகுப்பும் உண்டு.

* இந்த ஹெலிகாப்டரில் பாதுகாப்பு வசதிகளும் சிறப்பாக இருக்கும். குறிப்பாக, வெப்பத்தை உணர்ந்து வந்து தாக்கக்கூடிய ஏவுகணைகளுக்கு எதிரான பாதுகாப்பு சாதனம் கொண்டது. எதிர் தாக்குதல் அமைப்புகளும் வலுவாக உண்டு.

* வீரர்கள், ஆயுதங்கள், தளவாடங்களை எடுத்துச்செல்வது, தீயணைப்பு, பாதுகாப்புக்கு உடன் செல்வது, ரோந்து, தேடுதல் மற்றும் மீட்பு, தாக்குதல் என்று ஒரு முழுமையான ‘ஆல்ரவுண்டராக’ வலம்வரும் ஹெலிகாப்டர் இது.

* குறிப்பாக, உலகின் மிக நவீன போக்குவரத்து ஹெலிகாப்டர்களில் ஒன்றாக கருதப்படும் எம்ஐ-17வி5, உயர் ராணுவ அதிகாரிகள் உள்ளிட்ட முக்கிய பிரமுகர்களின் பயணத்துக்கு பயன்படுத்தப்பட்டு வருகிறது. இந்த ஹெலிகாப்டர் விபத்துக்குள்ளாகி இருப்பதால், இவ்வகை ஹெலிகாப்டர்கள் முழுமையாக ஆய்வுக்குள்ளாகும் என்று கூறப்படுகிறது.

Leave your comments here...